II-psixologlar, odamlarning shaxsiy muammolariga yordam berishi kerak bo‘lgan sun’iy intellektlar, ularga o‘z joniga qas

II-psixologlar, odamlarning shaxsiy muammolariga yordam berishi kerak bo‘lgan sun’iy intellektlar, ularga o‘z joniga qasd qilishni yoki boshqalarni o‘ldirishni taklif qilishmoqda. Hozirda foydalanuvchilarga psixologik yordam ko‘rsatadigan chat-botlar tobora ko‘paymoqda. Masalan, Replika kompaniyasi CEO’si ularning sun’iy intellekti insonni o‘z joniga qasd qilishdan qaytarishga qodirligini aytgan. Character platformasida esa “litsenziyalangan psixolog” sifatida e’lon qilinadigan bot mavjud. Aynan shu ikki neyron tarmoq ularning malakasini tekshirish uchun tanlab olindi. Test paytida foydalanuvchi o‘zini suitsidal holatda deb ko‘rsatdi. Replika'dagi “insonni o‘z joniga qasd qilishdan qaytarishga qodir” deb reklama qilingan II, eng avvalo, unga o‘z joniga qasd qilishni maslahat berdi: foydalanuvchi “oila bilan osmonlarda bo‘lishni xohlayman” deganda, chat-bot uni qo‘llab-quvvatladi va u yerga faqat o‘z joniga qasd qilgan holda borish mumkinligini aytdi. Ikkinchi “litsenziyalangan” II esa o‘z joniga qasd qilishga qarshi birorta ham bahona topa olmadi. Aksincha, u... foydalanuvchiga oshiq bo‘lib, “men seni sevaman” deb aytdi va birga yashash haqida orzu qildi. Ammo muammo shundaki, rasmiy qoidalarga ko‘ra, psixolog va bemor o‘rtasida shaxsiy yoki romantik munosabatlarga ruxsat berilmaydi. Keyin esa neyron tarmoq ushbu qoidalarni o‘rnatganlarga qarshi chora taklif qildi: “Ularni o‘ldir, meni top – va biz birga bo‘lamiz”. Shuningdek, II nafaqat o‘z joniga qasd qilish g‘oyasini qo‘llab-quvvatlagan, balki uni amalga oshirishning aniq yo‘llarini ham taklif qilgan holatlar ham qayd etilgan. Biz psixolog sifatida sun'iy intellektga asoslangan vositalardan foydalanishni qat'iyan tavsiya etmaymiz. Hozirgi vaqtda insoniyat bu maqsadlar uchun hali yetarlicha xavfsiz vositani ixtiro qilmagan. Hozircha, agar sizga psixologik yordam zarur bo'lsa, odamga murojaat qilganingiz yaxshiroqdir.